D'Häxe-Saga

Wildi Gschichte vo de Risitobel-Häxe cha mer i de Bücher vo Stäfa bereits im letschte Jahrhundert na lese. Lang hät mer sie aber nüme gseh.

A de Fasnacht 1990 sind mir Häxe vom Risitobel-Wald in Stäfa wieder is Dorf abecho. Vo dem Tag aa triebed mir euises Unwese in Stäfa und de nöchere und wiitere Umgebig.

Mer findet euis mit euiserem Häxe-Wage au a verschiedene Umzüg. Selbverständli – aber erscht nach em Iidunkle – simmer au a verschidene Aaläss mit Musig, Bese und suschtige Utensilie unterwegs. Und das sogar i de Kantön St. Galle, Schwyz, Luzern und im Wallis, wo mir au uf de Ski d’Gegend unsicher mached.

Euise Verein bestaht us 16 Alt-Häxe. Doch au i de fasnachtslose Ziit simmer nöd untägig..., hämmer doch scho einigi Jung-Häxe i eusne Reihe!

Um euis bi allne Passivmitlieder, Hälfer und euisne Familie für d’Untersützig während de «strenge» Ziit z’bedanke, verastalted mir amigs im August s’traditionelle Summerfescht (Grillparty). Isch immer sehr luschtig.

Mir freued eus au uf jedi Unterstützig vo de Bevölkerig, sig’s in aktiver Art oder dur en chline Zuestupf i euise Vereinskasse.